“ముగ్గు పిండి”
ముంగిలిపై నక్షత్రాల ముత్యాలు.. ఈ ముగ్గు పిండి
నల్లని నేలపై.. తెల్లని వెలుగులను
చిలకరించే వెండి ధార..
ఇంటి వాకిలికి కళను అద్దే
మంగళకరమైన “ముగ్గు పిండి”.
కలపని రాయితోనో, మెత్తని సున్నంతోనో
రూపుదిద్దుకొని..
ఇల్లాలు చేతివేళ్ల సందుల నుండి
ఒక క్రమశిక్షణతో జాలువారుతూ,
చుక్కలను కలిపే వంతెనలా..
పద్మాలను వికసింపజేసే మంత్రదండం.
పండుగ వేళల్లో రంగులను పులుముకొని..
మామూలు రోజుల్లో తెల్లని స్వచ్ఛతతో మెరిసి,
అతిథులకు హృదయపూర్వక ఆహ్వానం పలికే
నిశ్శబ్ద పలకరింపు.. ఈ ముగ్గు పిండి.
నేలపై పడినా దీనికి గౌరవం తగ్గదు..
కాళ్లకు తగిలినా తన అందం చెదరదు.
చీమలకు ఆహారమై, కంటికి విందులై,
దేవుడి పాదాల చెంత ముగ్గులై..
తమ ఉనికిని లోకానికి శుభసూచకంగా చాటుతుంది.
నేడు రంగు రంగుల స్టిక్కర్లు వచ్చినా..
చలువ చేసిన వాకిలిపై,
పలచని పేడ నీళ్ల తడిపై..
పిడికెడు పిండితో వేసే ఆ చిక్కని ముగ్గు రాజసమే వేరు!
నాటి సంస్కృతికి, నేటి ఇంటి కళకు
అచ్చమైన ప్రతీక.. మన ముగ్గు పిండి!
- బి. రామకృష్ణా రెడ్డి
సీనియర్ అకౌంట్స్ ఆఫీసర్
భద్రాద్రి కొత్తగూడెం
ఫోన్: 7382546949
Bureddy blooms.
